التّونسي و الحيط

كلّ واحد منّا عندو في بيتو عل أقلّ 4 حيوط ، يحميوه من البرد و العينين. أما في مخّ التّونسي اليوما يظهر لي إلّي الحيط المهام و الرّموز متاعو كثرت و ماعادش عندو كان مهمّة وقائيّة ، طره خلّينا نشوفو مع بعضنا كيفاش :

الحيط هو الحلّ للعبد إلّي الحلول إلّي لقاهم ما عجبوهش يقلّك " كان ما عجبكش أضرب راسك على الحيط "

الحيط هو رمز البطّال ، العبد إلّي ما عندو ما يعمل في حياتو يمشي " يشدّ الحيط "

الحيط ساعات يولّي مصدر إلهام للحكايات إلّي ما إيلها معنى و يرمز للخيال التّونسي الخصب في الهداري الفارغة وقنها

نقولو "حكاية مالحيط "

و في اللّخّر لازم نحكيو عالحيط اللّي يعبّر على النّاس إلّي داخلين بعضهم و مش عارفين ساقيهم من ريوسهم و اللّي يقولولهم داخلين في حيط "

أما زعما الحيوط لكل كيف كيف ؟